މުވައްޒަފުންގެ ހޭލުންތެރިކަމަށް "ނޯ ޔުއަރ ޔުނިވަރސިޓީ" ހަރަކާތް އެމްއެންޔޫއިން ބާއްވައިފި

ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) ގެ ފެކަލްޓީ އޮފް އެޑިޔުކޭޝަނުން އިސްނަގައިގެން، އެ ފެކަލްޓީގެ ތާރީޚާއި، ތަޢުލީމީ ޕްރޮގްރާމްތަކާއި، ވަސީލަތްތަކުގެ އިތުރުން ޚިދުމަތްތަކާ ގުޅޭގޮތުން މުވައްޒަފުންނަށް މަޢުލޫމާތު ދިނުމަށް ބޭއްވި "ނޯ ޔޯ ޔުނިވަރސިޓީ" ހަރަކާތް 2026 އޮކްޓޫބަރު 1 ވީ ބުރާސްފަތި ދުވަހު ބާއްވައިފިއެވެ.

ޔުނިވަރސިޓީގެ ބީ-ބްލޮކް ގްރައުންޑް ފްލޯގައި ހެނދުނު 9:00 އިން މެންދުރު 12:00 އަށް ކުރިއަށްދިޔަ މި ހަރަކާތަކީ، ފެކަލްޓީ އޮފް އެޑިޔުކޭޝަނުން މުދައްރިސުން ތަމްރީނުކުރުމަށާއި ތަޢުލީމީ ދާއިރާ ކުރިއެރުވުމަށް ކުރަމުންދާ މަސައްކަތްތަކާ ގުޅޭގޮތުން މުވައްޒަފުންގެ މެދުގައި ހޭލުންތެރިކަން އިތުރުކުރުމަށް ބޭއްވުނު އިންޓަރެކްޓިވް ސެޝަނެކެވެ.

މި ސެޝަނުގައި، ފެކަލްޓީގައި ހިންގާ ތަޢުލީމީ ޕްރޮގްރާމްތަކާއި، މުހިންމު ވަސީލަތްތަކާއި، ދަރިވަރުންނާއި މުވައްޒަފުންނަށް ފޯރުކޮށްދޭ ޚިދުމަތްތަކުގެ އިތުރުން، އެމް.އެން.ޔޫގެ ތެރޭގައި އެ ފެކަލްޓީ ތަރައްޤީވެފައިވާ ގޮތުގެ ތާރީޚީ މަޢުލޫމާތު ހިއްސާކުރެވުނެވެ. މީގެ އިތުރުން، އުނގަންނައިދިނުމުގެ އައު އުކުޅުތައް ތަޢާރަފުކުރުމާއި، މުވައްޒަފުންގެ ފަންނީ ތަރައްޤީއަށާއި، އެންމެންނަށް ބައިވެރިވެވޭފަދަ ފަހި އުނގެނުމުގެ މާޙައުލެއް ޤާއިމުކުރުމަށް ފެކަލްޓީން ދޭ އަހައްމިއްޔަތު މި ހަރަކާތުގައި ފާހަގަކުރިއެވެ.

މި އިސްނެގުމުގެ ސަބަބުން ފެކަލްޓީގައި ހުރި ވަސީލަތްތަކާއި ޚިދުމަތްތަކަށް މުވައްޒަފުން އަހުލުވެރިވުމުގެ ފުރުޞަތު ލިބިގެންދިޔައެވެ. އަދި މިއީ ޔުނިވަރސިޓީގެ މުޖުތަމަޢުގެ މެދުގައި ގުޅުން ބަދަހިކުރުމަށާއި، މަޢުލޫމާތު ބަދަލުކުރުމަށް މަގުފަހިވެގެންދިޔަ ކަމެކެވެ.

މި ހަރަކާތަކީ ދެމެހެއްޓެނިވި ތަރައްޤީގެ ލަނޑުދަނޑިތަކުގެ ތެރޭގައި ހިމެނޭ "ކޮލިޓީ އެޑިޔުކޭޝަން" (އެސް.ޑީ.ޖީ 4) އާއި، މުވައްޒަފުންގެ ފަންނީ ޤާބިލުކަން އިތުރުކުރުމަށް ބާރުއަޅާ "ޑީސެންޓް ވޯކް އެންޑް އިކޮނޮމިކް ގްރޯތް" (އެސް.ޑީ.ޖީ 8) އާ ގުޅުންހުރި ހަރަކާތެކެވެ. އަދި އެންމެންނަށް ބައިވެރިވެވޭ އުނގެނުމުގެ މާޙައުލެއް ބިނާކުރުމަށް މަސައްކަތްކުރުމުގެ ގޮތުން "ރިޑިއުސްޑް އިނިކުއަލިޓީސް" (އެސް.ޑީ.ޖީ 10) އާއި، މުއައްސަސާގެ އެކި ދާއިރާތަކުގެ މެދުގައި ގުޅުން ބަދަހިކުރުމަށް ބާރުއަޅާ "ޕާޓްނަރޝިޕްސް ފޯ ދަ ގޯލްސް" (އެސް.ޑީ.ޖީ 17) ހާސިލުކުރުމަށްވެސް މި ހަރަކާތުން އެހީތެރިވެދެއެވެ.

"ނޯ ޔޯ ޔުނިވަރސިޓީ" ފަދަ ހަރަކާތްތަކުގެ ޒަރީޢާއިން، ދިވެހިރާއްޖޭގެ ޤައުމީ ޔުނިވަރސިޓީން ދަނީ ބަދަހި މުޖުތަމަޢެއް ބިނާކޮށް، ފެންވަރު ރަނގަޅު އުނގަންނައިދިނުމާއި، އައު އީޖާދުތަކާއި، ފަންނީ ތަރައްޤީއަށް މަގުފަހިވާނޭފަދަ މާޙައުލެއް ޤާއިމުކުރުމަށް މެދުނުކެނޑި މަސައްކަތް ކުރަމުންނެވެ.