މަޖީދިއްޔާ ސްކޫލަށް 100 ފުރެން 200 ވަނަ ދުވަހު އެ ސްކޫލުގެ ޕްރިންސިޕަލުންގެ ހަނދާންތަކާއި މަސައްކަތް ދައްކުވައިދޭ ފޮޓޯ މައުރަޒެއް ރޭ ހުޅުވައިފިއެވެ.
ޤައުމީ އާޓް ގެލެރީގައި މިހާރު ކުރިއަށްދާ މި މައުރަޒަކީ، ރެއިން ފެށިގެން ޢާންމުންނަށް ހުޅުވާލައިގެން މިއަދާއި މާދަމާ ވެސް ކުރިއަށް ގެންދިއުމަށް ހަމަޖެހިފައިވާ މައުރަޒެކެވެ. އެގޮތުން މިއަދު ހަވީރު 4:00 އިން ރޭގަނޑު 10:00 އަށް އަދި މާދަމާ ހެނދުނު 10:00 އިން ރޭގަނޑު 10:00 އަށް މި މައުރަޒު ހުޅުވިފައި ހުންނާނެއެވެ.
މަޖީދިއްޔާ ސްކޫލަށް 100 އަހަރު ފުރުމުގެ މުނާސަބަތާ ގުޅުވައިގެން ރާވާފައިވާ ޙަރަކާތްތައް މި އަހަރާއި އަންނަ އަހަރުގެ ނިޔަލަށް ކުރިއަށްދާނެއެވެ.
މަޖީދިއްޔާ ސްކޫލުގެ މުސްކުޅި ދަރިވަރުންގެ ޖަމުޢިއްޔާއާއި އެ ސްކޫލް ގުޅިގެން އިންތިޒާމުކުރި މި ފޮޓޯ މައުރަޒުގައި، ވޭތުވެދިޔަ ދިގު މާޒީގައި އެ ސްކޫލުގެ ޕްރިންސިޕަލްކަން ކުރެއްވި ބޭފުޅުންނާއި، އެކި ދުވަސްވަރު ސްކޫލް ހިންގެވުމާ ޙަވާލުވެވަޑައިގެންނެވި އިސް ބޭފުޅުންގެ ފޮޓޯތައް ހިމަނާފައިވެއެވެ.
މައުރަޒު ހުޅުވުމުގެ ރަސްމިއްޔާތުގައި ވާހަކަދައްކަވަމުން، މަޖީދިއްޔާގެ މުސްކުޅި ދަރިވަރުންގެ ޖަމުޢިއްޔާގެ މި ދައުރުގެ ރައީސް އަޙްމަދު އަފްޢާލް ވިދާޅުވީ، ވޭތުވެދިޔަ 100 އަހަރުގެ ތެރޭގައި ސްކޫލް ހިންގެވި ޕްރިންސިޕަލުންގެ މަޢުލޫމާތާއި ފޮޓޯ ހޯދުމުގައި ބޮޑެތި ގޮންޖެހުންތަކަކާ ކުރިމަތިލާންޖެހުނު ކަމަށެވެ.
ތުންތުންމަތިން ދެކެވޭ ބައެއް ވާހަކަތައް ހުރި ނަމަވެސް، މި މައުރަޒުގައި ހިމަނާފައިވަނީ ތާރީޚީ ރެކޯޑުތަކުން ސާބިތުވާ ރަސްމީ މަޢުލޫމާތުތައް ކަން ފާހަގަކުރައްވައި އަފްޢާލް ވިދާޅުވީ، ފެންނަން ނެތް އަދި ލިބެން ދަތިވި ގިނަ ފޮޓޯތަކެއް ޒަމާނީ ފެންވަރަށް އިޔާދަކޮށް، ކުރީގެ ޕްރިންސިޕަލުންގެ ތަސްވީރުތައް އަލުން ދިރުވައިދިނުމަކީ ޖަމުޢިއްޔާއިން ހޯދި ބޮޑު ކާމިޔާބީއެއް ކަމަށެވެ.
"މި މައުރަޒުން ފެންނަ ކޮންމެ ބޭފުޅަކީ އަޅުގަނޑުމެންގެ ތަޢުލީމާއި ތަރުބިއްޔަތުގެ އަސްލު. ޤައުމަށް ޚިދުމަތްކުރުމަށާއި، އަޅުގަނޑުމެން ހޯދި ކޮންމެ ކާމިޔާބީއެއްގެ ބިންގާ އަޅައިދެއްވި ބޭފުޅުންނަކީ އެއީ،" އަފްޢާލް ވިދާޅުވިއެވެ. މީގެއިތުރުން، ޕްރިންސިޕަލުންގެ އިތުރުން ރާއްޖެއިން ބޭރުން ވަޑައިގެން މުޅި ޙަޔާތްޕުޅު މަޖީދިއްޔާގެ ދަރިވަރުން ބިނާކުރުމުގައި ހޭދަކުރެއްވި އެދުރުންގެ މަޢުލޫމާތު އެއްކުރުމުގެ މަސައްކަތް ވެސް ކުރިއަށްދާކަން އޭނާ ހާމަކުރެއްވިއެވެ.
މި ރަސްމިއްޔާތުގައި މަޖީދިއްޔާ ސްކޫލުގެ މިހާރުގެ ޕްރިންސިޕަލް އަޙްމަދު މުޖާހިދު ވިދާޅުވީ، ސްކޫލެއްގެ ވާހަކަ ދަރިވަރުންނާ ނުލައި ފުރިހަމަނުވާނެ ފަދައިން، މި މައުރަޒުން ފެންނަ ފޮޓޯތަކަކީ ހަމައެކަނި މޫނުތަކެއް ނުވަތަ ނަންތަކެއް ނޫން ކަމަށެވެ. އެއީ އެ ބޭފުޅުންގެ ޤުރުބާނީއާއި، ލީޑަރޝިޕާއި، ނިންމެވި ހަރުދަނާ ނިންމެވުންތަކުގެ ތާރީޚީ ރަމްޒެއް ކަމަށް ވިދާޅުވިއެވެ.
"މި ހުރިހާ ވާހަކަތަކެއް ފޮޓޯތަކުގެ ފާރުގައި ނުލިޔެވުނު ކަމުގައި ވިޔަސް، އެ ހަނދާންތައް ދެމިހުންނާނީ ދަރިވަރުންގެ ހިތްތަކުގައި އެބޭފުޅުންނަށް އޮންނަ ލޯތްބާއި ޤަދަރެއްގެ ސަބަބުން،" ޕްރިންސިޕަލް ވިދާޅުވިއެވެ.
މުޖާހިދު އިތުރަށް ފާހަގަކުރެއްވި ގޮތުގައި، ދިވެހިރާއްޖޭގެ ތަޢުލީމީ ދަންމަރަކީ މަޖީދިއްޔާ ސްކޫލެވެ. އަދި 100 އަހަރު ފުރޭ މި ތާރީޚީ ދަންމަރުގެ އަލިކަން ނިވިނުދީ ކުރިއަށް ގެންދިއުމަކީ މިއަދުގެ ދަރިވަރުންގެ ކޮނޑުގައި އެޅިފައިވާ ޒިންމާއެއް ކަމަށް ވެސް އޭނާ ވިދާޅުވިއެވެ.
advertisment
ހިޔާލު