2027 ވަނަ އަހަރުގެ ދިރާސީ ކަލަންޑަރު ނެރެފި

ދިރާސީ އަހަރުގެ ކިޔެވުން ކުރިއަށް ދާނީ، ޖެނުއަރީ 17އިން 9 ޑިސެމްބަރަށް

2027 ވަނަ އަހަރުގެ ވަގުތީ ދިރާސީ ކަލަންޑަރު ތައުލީމީ ވުޒާރާއިން މިއަދު ނެރެފިއެވެ.

މިއަދު ނެރުނު ދިރާސީ ކަލަންޑަރުގައިވާ ގޮތުން ދިރާސީ އައު އަހަރު ފެށެނީ ޖެނުއަރި މަހުގެ 17 ވަނަ ދުވަހުއެވެ. ދިރާސީ އަހަރު ނިމެނީ ޑިސެމްބަރު މަހުގެ 9 ވަނަ ދުވަހުއެވެ. މަތީ ސާނަވީގެ ކިޔެވުން ފަށާނީ 31 ޖެނުއަރީގައެވެ.

ފުރަތަމަ ޓާމުގައި 114ދުވަސް ހިމެނޭއިރު. ޓާމު ނިމެނީ ޖުލައި މަހުގެ 15 ވަނަ ދުވަހުއެވެ. ދެވަނަ ޓާމުގައި 87 ދުވަހު ސްކޫލު ދުވަހުގެ ގޮތުގައި ކަނޑައަޅާފައިވާއިރު، އޮގަސްޓް މަހުގެ އެއްވަނަ ދުވަހުން ފެށިގެން ޑިސެމްބަރު މަހުގެ 9އަށް ދެވަނަޓާމު ކުރިއަށް ދާނެއެވެ.

އަންނަ އަހަރު ދިރާސީ އަހަރު 201 ދުވަހުގެ ގޮތުގައި ކަނޑައަޅާފައިވެއެވެ. އެއީ އޭގެތެރެއިން ކިޔަވައި ދޭނީ 163 ދުވަހުއެވެ. އިމްތިޙާނުތަކަށް 16 ދުވަހާއި ރިޕޯޓް ތައްޔާރުކުރުމަށް 10 ދުވަހާއި މުދައްރިސުންގެ ޕްރޮފެޝަނަލް ޑިވެލޮޕްމަންޓް ދުވަހުގެ ގޮތުގައި ހަތް ދުވަސް ކަނޑައަޅާފައިވެއެވެ. އަދި ކިޔަވައި ނުދޭ ދުވަހުގެ ގޮތުގައި ފަސް ދުވަސް ކަނޑައަޅާފައިވެއެވެ.

ފުރަތަމަ ޓާމުގެ މެދު ޗުއްޓީ ލިބޭނީ މެއި މަހުގެ 16އިން 22 އަށެވެ. ދެވަނަ ޓާމުގެ މެދު ޗުއްޓީ ލިބޭނީ ސެޕްޓެމްބަރު މަހުގެ 19އިން 25އަށެވެ.

އިމްތިޙާނު އޮންނަ ދުވަސްތަކަށް ބަލާއިރު، ފުރަތަމަ ޓާމުގެ އިމްތިޙާނު ކުރިއަށް ދާނީ 29 ޖޫންއިން 10 ޖުލައި އަށެވެ. ދެވަނަ ޓާމުގެ އިމްތިޙާނު ކުރިއަށް ދާނީ 23 ނޮވެމްބަރުން ފެށިގެން 4 ޑިސެމްބަރަށެވެ.

ގުރޭޑް 10ގެ ކުދިންނާއި ގުރޭޑް 12ގެ ދަރިވަރުންގެ މޮކް އެގްޒާމް ކުރިއަށް ދާނީ 26 އޮގަސްޓްއިން 9 ސެޕްޓެމްބަރަށެވެ.

ސާނަވީ އާއި މަތީ ސާނަވީ ނިންމާ އިމްތިޙާނު ކުރިއަށް ދާނީ އޮކްޓޯބަރު/ ނޮވެމްބަރުގައެވެ. ގުރޭޑް 11ގެ އެޗްއެސްސީއާއި އެޑެކްސެލްގެ އޭއެސް އިމްތިޙާނު ކުރިއަށް ދާނީ މެއި/ޖޫންގައެވެ.