ގާނޫނީ ދާއިރާއާއި ސިއްޙީ ދާއިރާގެ އިތުރުން ސައިކޮލޮޖީގެ ދާއިރާއިން އިތުރު ކޯސްތަކެއް ވިލާކޮލެޖުން ފަށަނީ

ގާނޫނީ ދާއިރާއާއި ސިއްޙީ ދާއިރާގެ އިތުރުން ސައިކޮލޮޖީގެ ދާއިރާއިން އިތުރު ކޯސްތަކެއް ވިލާކޮލެޖުން ފަށަން ތައްޔާރުވަމުންދާ ކަމަށް އެ ކޮލެޖުން އިއުކާން ކޮށްފިއެވެ.

މިހާރު ކުރިއަށް ގެންދާ ދަސްވެނިވުމުގެ ހަފްލާގައި ވާހަކަ ދައްކަވަމުން ކުރިމަގުގައި އަލަށް ފެށުމަށް ރާވާފައިވާ މުހިންމު ޕްރޮގްރާމްތަކުގެ މަޢުލޫމާތު ވިލާ ކޮލެޖުގެ ވައިސް ރެކްޓަރ، އެސޯސިއޭޓް ޕްރޮފެސަރ ޑރ. ޢަލީ ނަޖީބު ހިއްސާކުރެއްވިއެވެ. އެގޮތުން:

• ޤާނޫނީ ދާއިރާއިން: ޕޮލިސިންގ، ކްރިމިނޮލޮޖީ، ކްރިމިނަލް އިންވެސްޓިގޭޝަން، އަދި ރާއްޖޭގައި ޤާނޫނީ ޕްރެކްޓިސް ކުރުމުގެ ލައިސަންސް ހޯދުމަށް ދަރިވަރުންނަށް މަގުފަހިކޮށްދޭ ސީ.އެލް.ޓީ.ޕީ ޕްރޮގްރާމް.
• ޞިއްޙީ ދާއިރާއިން: ނަރުސިންގގެ އެކި ސްޕެޝަލައިޒޭޝަންތަކާއި، ފިޒިއޮތެރަޕީ، ސްޕީޗް ތެރަޕީ، ލެބޯޓަރީ ސައިންސް، އަދި މާސްޓަރ އޮފް ކްލިނިކަލް ފާމަސީ.
• ސައިކޮލޮޖީގެ ދާއިރާއިން: ފޮރެންސިކް ސައިކޮލޮޖީ އާއި ހެލްތު ސައިކޮލޮޖީގެ މާސްޓަރސް ސްޕެޝަލައިޒޭޝަންތަކާއި، ސޯޝަލް ވޯކް ޕްރޮގްރާމް.

ވިލާ ކޮލެޖުގެ ދަސްވެނިވުމުގެ ރަސްމިއްޔާތު ކުރިއަށް ގެންދަނީ ހަ ދަންފަޅިއަކަށް ބަހާލައިގެންނެވެ.

އިއްޔެ ކުރިއަށް ގެންދިޔަ ތިން ދަންފަޅީގައިވެސް ދަސްވެނިންނާ މުޚާޠަބުކުރައްވައި ވިލާ ކޮލެޖުގެ ރެކްޓަރ ޑރ. އަޙްމަދު އަންވަރު ވިދާޅުވީ، މި ޙަފްލާއަކީ ހަމައެކަނި ކިޔެވުން ނިންމުން ފާހަގަކުރުމަށް ބާއްވާ ޙަފްލާއެއް ނޫން ކަމަށާއި، ދަރިވަރުން ހޯދި ކާމިޔާބީއާއި އެކަމަށް ކުރި ބުރަ މަސައްކަތާއި ހިތްވަރުގެ އަގުވަޒަންކުރުމަށް ބާއްވާ ޙަފްލާއެއް ކަމަށެވެ.

“މިއަދު މި ދަރުބާރުގައި އަޅުގަނޑުމެން މި ފާހަގަކުރަނީ، ތިޔަ ދަސްވެނިން ވޭތުވެދިޔަ މަސްތަކުގައި ނުވަތަ އަހަރުތަކުގައި ޢާއިލީ ޒިންމާތަކާއި ވަޒީފާގެ މަސްއޫލިއްޔަތުވެސް އުފުލަމުން ކުރި ބުރަ މަސައްކަތުގެ ކާމިޔާބީ،” ރެކްޓަރ ވިދާޅުވިއެވެ.

ރެކްޓަރ އިތުރަށް ފާހަގަކުރެއްވި ގޮތުގައި، ދަސްވެނިން ރަމްޒުކޮށްދެނީ ޢާއިލާތަކުގެ އުއްމީދާއި، ޢިލްމު ހޯދުމަށް ކުރި ގަދަ ހިތްވަރާއި ޤުރުބާނީއެވެ. ވިލާ ކޮލެޖަކީ އިންޑަސްޓްރީތަކަށް ބޭނުންވާ ޤާބިލު މީހުން ތަމްރީނުކުރާ މަރުކަޒެއްކަން ފާހަގަކުރައްވައި، ދުނިޔެ އާދައާ ޚިލާފު ބާރުމިނެއްގައި ކުރިއަރަމުންދާ މި ދަނޑިވަޅުގައި، ކޮންމެ ދަސްވެނިއަކުވެސް އިސްލާމީ މަތިވެރި ޢަޤީދާގައި ސާބިތުވެހުރި، ދިވެހިންގެ ސަޤާފަތަށް އިޙްތިރާމްކުރާ، ތެދުވެރި ދިވެއްސަކަށް ވުމަށް ރެކްޓަރ ނަޞޭޙަތްތެރިވެވަޑައިގެންނެވިއެވެ.

ވައިސް ރެކްޓަރ ޑރ. ޢަލީ ނަޖީބު ތިން ދަންފަޅީގައިވެސް ދެއްކެވި ވާހަކަފުޅުގައި، މި އަހަރުގެ ދަސްވެނިންނާއެކު ވިލާ ކޮލެޖުން ދަސްވެނިވި ދަރިވަރުންގެ ޖުމްލަ ޢަދަދު 27،000 އަށްވުރެ މައްޗަށް އަރާފައިވާކަން ހާމަކުރެއްވިއެވެ. މި ދަސްވެނިންނަކީ މުޅި ރާއްޖޭގައާއި ރާއްޖެއިން ބޭރުގައިވެސް ފެތުރިފައިވާ ވަރުގަދަ ނެޓްވޯކެއްކަން ފާހަގަކުރައްވައި، މި ޢަދަދުތަކަކީ ދިވެހިންނަށް އަމިއްލަ ޤައުމުގައި ތިބެގެން ފެންވަރު ރަނގަޅު ތަޢުލީމު ފޯރުކޮށްދިނުމަށް ވިލާ ކޮލެޖުގެ ބާނީ، އޮނަރަބަލް ޑރ. ޤާސިމް އިބްރާހީމް ގެންގުޅުއްވާ ތަޞައްވުރު ޙަޤީޤަތަކަށް ވަމުންދާކަމުގެ ހެއްކެއް ކަމުގައި އެމަނިކުފާނު ވިދާޅުވިއެވެ.

މީގެ އިތުރުން، ވިލާ ކޮލެޖަށް ލިބިފައިވާ ބައިނަލްއަޤްވާމީ ގިނަ ކާމިޔާބީތަކަށް އަލިއަޅުއްވާލައްވަމުން ވައިސް ރެކްޓަރ ވިދާޅުވީ، ދިވެހިރާއްޖޭގައި ހުރި ހުރިހާ ޔުނިވަރސިޓީ، ކޮލެޖު އަދި އިންސްޓިޓިއުޓްތަކުގެ ތެރެއިން ކިއު.އެސް ފައިވް ސްޓާރ އެކްސެލެންޓް ރޭޓިންގ ޙާޞިލްކޮށްފައިވާ ހަމައެކަނި މުއައްސަސާއަކީ ވިލާ ކޮލެޖު ކަމަށެވެ. އަދި ޓައިމްސް ހަޔަރ އެޑިއުކޭޝަންގެ ސަސްޓެއިނަބިލިޓީ ރޭޓިންގގައި ވޭތުވެދިޔަ އަހަރު 401–600 ގެ ބޭންޑުގައި ހިމެނުނު ވިލާ ކޮލެޖު، މި އަހަރު ވަނީ 301–400 ގެ ބޭންޑަށް ކުރިއަރާފައެވެ. ޚާއްޞަކޮށް، ފެންވަރު ރަނގަޅު ތަޢުލީމު ފޯރުކޮށްދިނުމުގެ ދާއިރާއިން (އެސް.ޑީ.ޖީ 4) ދުނިޔޭގެ ޓޮޕް 100 މުއައްސަސާގެ ތެރޭގައި ވިލާ ކޮލެޖު ހިމެނިފައިވާކަން ޑރ. ނަޖީބު ފަޚުރުވެރިކަމާއެކު ފާހަގަކުރެއްވިއެވެ.

ހަމައެއާއެކު، އެސޯސިއޭޝަން އޮފް ކޮމަންވެލްތް ޔުނިވަރސިޓީޒްގެ ކިންގްސް ކޮމަންވެލްތް ފެލޯޝިޕް އެންޑް ގްރެޖުއޭޓް ޕާތްވޭގެ ހޯސްޓް ޔުނިވަރސިޓީއެއްގެ ގޮތުގައި ވިލާ ކޮލެޖު މިދިޔަ އަހަރު ހަމަޖެހުނު ކަމަށާއި، ރާއްޖެއިން މި ފުރުޞަތު ލިބުނު ހަމައެކަނި މުއައްސަސާއަކީ ވިލާ ކޮލެޖުކަން ވެސް ޑރ. ނަޖީބު ފާހަގަކުރެއްވިއެވެ.

“މި ހުރިހާ ކަމެއްގެ ބޭނުމަކީ ތިޔަ ބޭފުޅުންނަށް މިއަދު ލިބިވަޑައިގަންނަވާ ސެޓްފިކެޓުގެ އަގު އިތުރުކޮށް، ސެޓްފިކެޓަށް އިތުބާރު ހޯދައިދިނުން،” ވައިސް ރެކްޓަރ ވިދާޅުވިއެވެ. “ވިލާ ކޮލެޖުން ގްރެޖުއޭޓްވާ ކުއްޖާ ތަފާތުވާނެ. ތިޔަ ބޭފުޅުން އެ ތަފާތު ދައްކަވާނެ،” ކަމަށްވެސް އެމަނިކުފާނު ވިދާޅުވިއެވެ.

މި އަހަރު ވިލާ ކޮލެޖުން އަލަށް ތަޢާރަފްކުރި ދެ މުހިންމު ކަމަކަށް ވެސް ވައިސް ރެކްޓަރ އަލިއަޅުއްވާލެއްވިއެވެ. އެއީ ދަސްވެނިވާ ދަރިވަރުންގެ ފަރާތުން މުޖުތަމަޢަށާއި ސިނާޢަތްތަކަށް ޢަމަލީ ގޮތުން ފައިދާހުރި ކަންކަން ކުރުމުގެ މާޙައުލެއް ފަހިކޮށްދޭ “ގްރެޖުއޭޓް އިމްޕެކްޓް ސެމިސްޓަރ” އާއި، އެކަޑެމިކް ޤާބިލިއްޔަތުގެ އިތުރުން ކްލާސްރޫމުން ބޭރުން ދަރިވަރުން ހޯދާ ތަޖުރިބާތަކާއި ޙަރަކާތްތައް، ފާހަގަކޮށްދޭ “ގްރެޖުއޭޓް ލަރނިންގ ޕްރޮފައިލް” އެވެ.