ދިވެހިރާއްޖޭގެ ގައުމީ ޔުނިވަރސިޓީއާއި ފޮރިން ސަރވިސް އިންސްޓިޓިއުޓް އޮފް މޯލްޑިވްސް (ފޯސިމް) ގުޅިގެން "ޑިޕްލޮމަސީ ވީކް" ގެ ތެރެއިން ހާއްސަ ސެޝަނެއް ދަރިވަރުންނަށް ބާއްވައިފިއެވެ.
މިނިސްޓްރީ އޮފް ފޮރިން އެފެއާޒްގެ އިސްނެގުމުގެ މަތިން ކުރިއަށްގެންދާ "ޑިޕްލޮމަސީ ވީކް 2026″ އަކީ، ރާއްޖޭގެ ޚާރިޖީ ސިޔާސަތާއި، ޚާރިޖީ ދާއިރާގައި މަސައްކަތްކުރާ މުވައްޒަފުން ކުރަމުންދާ މަސައްކަތްތަކާ ގުޅޭގޮތުން އާންމުންގެ ހޭލުންތެރިކަން އިތުރުކުރުމަށްޓަކައި، އެއް ހަފުތާގެ މުއްދަތަށް ސިލްސިލާކޮށް ކުރިއަށްގެންދާ ތައުލީމީ އަދި އިޖުތިމާއީ ހަރަކާތްތަކެކެވެ.
މިއަދުގެ ސެޝަނުގައި ޔުނިވަރސިޓީގެ ދަރިވަރުންނާއި، މުދައްރިސުންގެ އިތުރުން ޚާރިޖީ ދާއިރާގެ އިސް ބޭފުޅުން ބައިވެރިވެވަޑައިގެން، ބައިނަލްއަގުވާމީ މައިދާނުގައި ރާއްޖެފަދަ ކުދި ޖަޒީރާ ގައުމުތަކުން ކުރިމަތިލާ ގޮންޖެހުންތަކާއި، ގައުމީ މަސްލަހަތު ހިމާޔަތްކުރުމަށް ކުރާ މަސައްކަތްތަކާ ގުޅޭގޮތުން ފުޅާދާއިރާއެއްގައި މަޝްވަރާކުރައްވާފައިވެއެވެ.
ޑިޕްލޮމަސީ ވީކްގެ ތެރެއިން ޔުނިވަރސިޓީ ދަރިވަރުންނާ ބައްދަލުކުރުމުގެ މުހިންމުކަމާ ގުޅޭގޮތުން ވާހަކަފުޅު ދައްކަވަމުން މިނިސްޓަރ އޮފް ފޮރިން އެފެއާޒް ވިދާޅުވީ، ރާއްޖެފަދަ ކުޑަ ގައުމަކަށް ބައިނަލްއަގުވާމީ މައިދާނުގައި އޮތް އެންމެ ވަރުގަދަ ހަތިޔާރަކީ އަދި ގައުމު ދިފާއުކޮށްދޭ އެންމެ ފުރަތަމަ ސަފަކީ ޚާރިޖީ ސިޔާސަތު ކަމަށެވެ. އެމް.އެން.ޔޫގެ ހުނަރުވެރި ދަރިވަރުންނާ މިގޮތަށް ބައްދަލުކުރުމުގެ މައިގަނޑު މަގުސަދަކީ ޚާރިޖީ ސިޔާސަތު އަމަލީގޮތުން ހިންގާ ގޮތް އޮޅުންފިލުވައިދިނުމުގެ އިތުރުން، މުސްތަގުބަލުގައި ގައުމުގެ ހައްގުގައި މަސައްކަތްކުރާނެ އައު ޖީލެއްގެ ޑިޕްލޮމޭޓުން އުފެއްދުމަށް ހިތްވަރު ދިނުންކަން މިނިސްޓަރު ފާހަގަކުރެއްވިއެވެ.
މި ސެޝަނުގެ ތެރެއިން، ބައިނަލްއަގުވާމީ ޖަމިއްޔާތަކުގައި، ހާއްސަކޮށް ތިމާވެށީގެ ވަކާލާތުތަކާއި ބައިނަލްއަގުވާމީ އެއްބާރުލުން އިތުރުކުރުމުގައި ރާއްޖެއިން އަދާކުރާ އިސް ދައުރާ ގުޅޭ މައުލޫމާތު ބައިވެރިންނާ ހިއްސާކުރެވުނެވެ. މީގެއިތުރުން، ސުވާލާއި ޖަވާބުގެ ސެޝަނެއް ކުރިއަށް ގެންދެވުނުއިރު، ދަރިވަރުންނަށް ވަނީ ތައުލީމީ މަރުހަލާގައި އުނގެނޭ ތިއަރީތަކާއި ޚާރިޖީ ދާއިރާގެ އަމަލީ ތަޖުރިބާއާ ހުރި ގުޅުންތަކާ ބެހޭގޮތުން، މި ދާއިރާގެ ތަޖުރިބާކާރުންނާ ސުވާލުކޮށް މައުލޫމާތު ސާފުކުރުމުގެ ފުރުސަތު ލިބިފައެވެ.
މި ހަރަކާތް ނިންމާލާފައިވަނީ ހާޒިރުވި އިއްޒަތްތެރިންނާއި، މުދައްރިސުން އަދި ދަރިވަރުންގެ މެދުގައި ބޭއްވުނު ގުޅުން ބަދަހިކުރުމުގެ ހަރަކާތަކުންނެވެ.

ހިޔާލު