އެންއައިއީ އާއި ޑީޕީ ގުޅިގެން ސަބްޖެކްޓް ފޯރަމް ބާއްވަނީ

ނެޝަނަލް އިންސްޓިޓިޔުޓް އޮފް އެޑިޔުކޭޝަން އާއި ޑިޕާޓްމެންޓް އޮފް ޕަބްލިކް އެގްޒަމިނޭޝަންސް ގުޅިގެން ސަބްޖެކްޓް ފޯރަމް ކުރިޔަށް ގެންދަން ނިންމައި، އެކަމުގައި ކުރިއަށް ދިއުމަށް މަޝްވަރާ ކޮށްފިއެވެ.

ސަބްޖެކްޓް ފޯރަމް ބާއްވަނީ އެޗްއެސްސީއީ  އާއި އެސްއެސްއީ  އިމްތިހާނަށްފަހު  ތައްޔާރު ކުރާ އެގްޒަމިނާރސް ރިޕޯރޓުން ފާހަގަވި ކަންކަމަށް ރިޢާޔަތްކޮށް މުދައްރިސުންނަށް މައުލޫމާތު ދިނުމަށެވެ.

ޑިޕީއީ އިން ފާހަގަ ކުރި ގޮތުގައި، އެ މުއްސަސާގެ އެގްޒަމިނާރސް ރިޕޯރޓް ސްކޫލް މަދަރުސާ ތަކުގެ ޕީޑީ ސެޝަންގައި މުދައްރިސުންނާ ޙިއްސާކުރުމުން، އިސްލާމް މާއްދާ އާއި ދިވެހި މާއްދާ ކިޔަވައިދެއްވުމުގައި މި ދެމާއްދާގެ މުދައްރިސުންގެ ވަރަށް ގިނަ ކަންބޮޑުވުންތައް ހުރިކަން ފާހަގަ ކުރެވިފައިވާ ކަމަށެވެ. އެހެންކަމުން މި ކަންކަން ޙައްލު ކޮށް ދަރިވަރުންނަށް އެންމެ ފައިދާހުރި ގޮތުގައި މި ދެމާއްދާ ކިޔަވައިދެއްވުމަށް މަގުފަހިވާނީ، މުދައްރިސުންނަށް މަޢުލޫމާތު ފޯރުކޮށް ދިނުމުގެ މަސައްކަތް ދެ މުއައްސަސާ ގުޅިގެން ކުރިޔަށް ދިއުމުން ކަމަށް ޑީޕީއީން ބުނެފައިވެއެވެ.

ސަބްޖެކްޓް ފޯރަމް ބާއްވާނެ ދުވަހެއް ކަނޑައަޅާފައި ނުވާއިރު، އެ ފޯރަމަށް ތައްޔާރު ވުމުގެ ގޮތުން، އެގްޒަމިނާރސް ރިޕޯރޓްގައި ފާހަގަކޮށްފައިވާ ކަންތައްތައް ދިރާސާ ކުރުމުގެ މަސައްކަތް އެންއައިއީ އިން ކުރިއަށް ގެންދަން ވަނީ ނިންމާފައެވެ.