ރަނގަޅު ޕްރިންސިޕަލުން ސްކޫލް ހިންގާނީ ބެލެނިވެރިންގެ މަޝްވަރާއާއި ލަފާ ހޯދައިގެން ކަމަށް ތައުލީމާއި މަތީ ތައުލީމާ ބެހޭ ވަޒީރު ޑރ. އިސްމާއިލް ޝަފީއު ވިދާޅުވެއްޖެއެވެ.
ހިރިޔާ ސްކޫލުގެ އަހަރީ އިނާމު ދިނުމުގެ ހަފުލާ ޝަރަފުވެރިކޮށްދެއްވައި، ވަޒީރު ވިދާޅުވީ، ސްކޫލުން ކަމެއް ބޭނުންވެގެން ބެލެނިވެރިންގެ ކައިރީގައި އެކަމެއް ކޮށްދޭން ބުނާ ވާހަކަ މަދުން ނަމަވެސް އަޑުއިވޭ ކަމަށާއި ކުދިން ތަރުބިއްޔަތު ކުރުމާއި އުނގަންނައިދިނުމަކީ ސްކޫލަށް އެކަނި ކުރެވޭނެ ކަމެއް ނޫން ކަމަށެވެ.
"މިއީ ޕާޓްނަރޝިޕެއް. މި ޕާޓްނަރޝިޕްގެ އެންމެ މުހިންމު ބައިވެރިންނަކީ ބެލެނިވެރިން. ބެލެނިވެރިންގެ ފަރާތުން މަދަދާ އެހީތެރިކަމަށް ސްކޫލުން އެދޭނެ" ބެލެނިވެރިންނަށް އިޝާރާތް ކުރައްވައި ވަޒީރު ޑރ. އިސްމާއިލް ވިދާޅުވިއެވެ.
ޑރ. އިސްމާއިލް ވިދާޅުވި ގޮތުގައި، ކާމިޔާބު ސްކޫލެއްގައި ހުންނާނެ ސިފަތައް ދެނެގަތުމަށްޓަކައި ދިރާސާވެރިން ހެއްދެވި ދިރާސާއިން އެނގެނީ، 7ސިފައެއް ސްކޫލެއްގައި ޤާއިމް ކުރެވިއްޖެނަމަ އެ ސްކޫލަކީ ކާމިޔާބު ސްކޫލެކެވެ. އެއީ، ސާފު ތަސައްވުރެއް އޮތުމާއި ދަރިވަރުންގެ ކިޔަވައިދިނުމުގެ ވަގުތުތައް ހިމާޔަތްވެފައި އޮތުމާއި ރަނގަޅު ލީޑަރޝިޕެއް އޮތުމެވެ. އަދި ދަރިވަރުން ކިޔަވާ ވަގުތު ސަލާމަތްތެރިވެފައި އޮތުމާއި އަމާން ރައްކާތެރި މާހައުލެއްގެ ގޮތުގައި ރައްކާތެރިވެފައި އޮތުމުގެ އިތުރުން ބެލެނިވެރިންނާއި މުދައްރިސުންނާއި ސްކޫލުގެ މެދުގައި ރަނގަޅު ކުޅުމެއް އޮތުމެވެ.
މިފަދަ ބަދަހި ގުޅުމެއް އަޅުގަނޑުމެންގެ ސްކޫލުތަކުގެ ތެރޭގައި އޮންނަ ކަމުގައި ވަނީނަމަ، ސްކޫލަށް ބޭނުންވާ ކަންކަމުގައި، ދަރިވަރުންގެ ކުރިއެރުމާއި އުނގެނުމުގެ ކަންކަމުގައި، ބައިވެރިވާ ހަރަކާތްތަކުގައި ހަމަޔަގީނުން ވެސް ބެލެނިވެރިން ބައިވެރިވާން ޖެހޭނެ ކަމަށް މިނިސްޓަރު ވިދާޅުވިއެވެ.
" ސްކޫލުން، ބެލެނިވެރިންގެ ފަރާތުން އެހީތެރިކަމަށް އެދޭނެ. މަދަދަށް އެދޭނެ. ބެލެނިވެރިންގެ ފަރާތުން އިންތިހާއަށް އެހީތެރިކަމަށް އެދޭނެ. މިކަން އަޅުގަނޑުމެންނަށް ދުވަހަކުވެސް ހުއްޓައެއްނުލެވޭނެ" ތުއްތު ކުދިންގެ ކިޔެވުމަށް އެހީތެރިކަމަށް އެދިއްޖެކަމުގައި ވަނީނަމަ ފަޚުރުވެރިކަމާއެކު އެހީތެރިވުމަށް އަބަދުވެސް ބެލެނިވެރިން ތިއްބެވުމަށް އިޝާރާތް ކުރައްވައި ވަޒީރު ވިދާޅުވިއެވެ.
ޑރ. އިސްމާއިލް ވިދާޅުވީ، ކެތްތެރިކަމާއެކު ސްކޫލުގެ ކަންކަމުގައި ބެލެނިވެރިން ބައިވެރިވާންވަނެ ކަމަށާއި ސްކޫލަކީ އަބަދުމެ ކަންކަން ރަނގަޅުކުރަންޖެހޭ ތަނަކަށް ވާހިނދުގައި، ކެތްތެރިކަމާ އިހުތިރާމާއެކު ސްކޫލުގެ ކަންކަމުގައި ބައިވެރިވެވަޑައިގެން ދަރިވަރުންގެ ކިޔެވުމުގެ ކަންތައްތައް ގެންދަވަންވާނެ ކަމަށެވެ.
"ބެލެނިވެރިންނާ ނުލައި ސްކޫލެއް ކުރިއަކަށް ނުދޭނެ. ބެލެނިވެރިންގެ އެހީތެރިކަމާ ނުލައި ސްކޫލެއް ކުރިއަކަށް ނުދާނެ. އަޅުގަނޑު ދެކޭގޮތުގައި، ރަނގަޅު ޕްރިންސިޕަލުން ބެލެނިވެރިން ބައިވެރިކޮށްގެން ބެލެނިވެރިންގެ އެހީތެރިކަން ހޯދައިގެން ބެލެނިވެރިން ގެ މަޝްވަރާއާއި ލަފާ ހޯދައިގެން ސްކޫލްތައް ހިންގާނީ" އެކަމަށް ފަހިކޮށް ތިބެން ބެލެނިވެރިންނަށް އިލްތިމާސް ކުރަންވަމުން ވަޒީރު ވިދާޅުވިއެވެ.
ނިންމާލަމުން ވަޒީރު ޑރ. އިސްމާއިލް ދަރިވަރުންނަށް ހަނދާން ކޮށްދެއްވީ، ރިވެތި އަޚްލާގެއް ނެތި ތައުލީމު އެއީ މުހިންމު އެއްޗެއް ނޫން ކަމަށެވެ. ތައުލީމުގެ ރިވެތި ކުލަތައް ފެނިގެން ދާނީ ރިވެތި އަޚްލާޤަކާ އެކީގައި ކަމަށެވެ.
އިޙްތިރާމް ކުރާ އެހެން މީހުންނަށް ކުލުނާއި ލޯބިދޭނެ ބައެއްގެ ގޮތައި ދެމިތިބުމަށް އެދެމުން ވަޒީރު ވިދާޅުވީ، "ތިޔަކުދިންނަށް މަދަދުދޭ މައިންބަފައިންނާއި މުދައްރިސުންގެ އަގުވަޒަންކުރަންވާނެ" ކަމަށެވެ.
advertisment
ހިޔާލު