ދިވެހިރާއްޖޭގެ ގައުމީ ޔުނިވަރސިޓީ (އެމް.އެން.ޔޫ) އިން ފަންނީ ހުނަރުވެރިކަމާއި، އުނގެނުމާއި، އަދި ބައިނަލްއަޤްވާމީ ގުޅުންތައް ބަދަހިކުރުމުގެ ގޮތުން ކުރިއަށްގެންދިޔަ ހަރަކާތްތައް ފާހަގަކުރުމަށް މިއަދު ޚާއްޞަ ރަސްމިއްޔާތެއް ބާއްވައިފިއެވެ. މިއީ، ބައިނަލްއަޤްވާމީ އިލްމީ އަދި ފަންނީ މުޖުތަމައުތަކާއެކު އޮންނަ ގުޅުން ބަދަހިކޮށް، ބައިވެރިންގެ މަޢުލޫމާތާއި ހުނަރު އިތުރުކުރުމަށް މަގުފަހިކޮށްދިން ހަތަރު ތަމްރީނު ޕްރޮގްރާމެއްގެ ކާމިޔާބީ ފާހަގަކުރުމަށް ބޭއްވި ރަސްމިއްޔާތެކެވެ.
މި ރަސްމިއްޔާތުގެ ޝަރަފުވެރި މެހެމާނުންނަކީ ޖަޕާނުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު ހަރ އެކްސެލެންސީ އިޝިގާމީ ރުމީކޯ އަދި އޮސްޓްރޭލިއާއިން ދިވެހިރާއްޖެއަށް ކަނޑައަޅާފައި ހުންނަވާ ހައިކޮމިޝަނަރު ހިޒް އެކްސެލެންސީ ޑޭވިޑް ޖެސަޕްއެވެ.
މި ރަސްމިއްޔާތުގައި ފާހަގަކޮށްފައިވާ ބައިނަލްއަޤްވާމީ ގުޅުންތަކުގެ ދަށުން ކުރިއަށްގެންދިޔަ މުހިންމު ހަތަރު ހަރަކާތަކީ:
- ޖަޕާން ފައުންޑޭޝަނާ ގުޅިގެން މޯލްޑިވްސް ކަސްޓަމްސް ސަރވިސްގެ އޮފިސަރުންނަށް އަމާޒުކޮށްގެން 10 އޮގަސްޓުން 21 ސެޕްޓެމްބަރު 2026 އަށް ކުރިއަށްގެންދިޔަ 30 ގަޑިއިރުގެ ޖަޕާނީ ބަހުގެ ކޯސް.
- ޔުނިވަރސިޓީ ސައިންސް އިސްލާމް މެލޭޝިއާ (ޔޫ.އެސް.އައި.އެމް) އާ ގުޅިގެން އެމް.އެން.ޔޫގެ އެރަބިކް ލޭންގުއޭޖް ޑިޕާޓްމަންޓުގެ މުވައްޒަފުންނަށް 6 އިން 9 ސެޕްޓެމްބަރު 2026 އަށް މެލޭޝިއާގައި ކުރިއަށްގެންދިޔަ ފަންނީ ތަމްރީނު ޕްރޮގްރާމް.
- އެމް.އެން.ޔޫގެ ފެކަލްޓީ އޮފް އާޓްސްގެ މުވައްޒަފުންނަށް އަމާޒުކޮށްގެން އޮސްޓްރޭލިއާގެ ކާޓިން ޔުނިވަރސިޓީއާ ގުޅިގެން ޕާތްގައި ކުރިއަށްގެންދިޔަ ފެކަލްޓީ ޑިވެލޮޕްމަންޓް ޕްރޮގްރާމް.
- މޯލްޑިވްސް ލައިބްރަރީ އެސޯސިއޭޝަނާއި ކާޓިން ޔުނިވަރސިޓީއާ ގުޅިގެން، އެމް.އެން.ޔޫގެ ލައިބްރަރީ އެންޑް އިންފޮމޭޝަން ސައިންސްގެ ދަރިވަރުންނާއި، ކުރީގެ ދަރިވަރުން އަދި މި ދާއިރާގެ ފަންނީ ބޭފުޅުންނަށް އަމާޒުކޮށްގެން 9 އިން 19 ސެޕްޓެމްބަރު 2026 އަށް ޕާތްގައި ކުރިއަށްގެންދިޔަ ލައިބްރަރީ އެންޑް އިންފޮމޭޝަން ސަރވިސަސް ވޯކްޝޮޕް.
ޖަޕާން ބަހުގެ ކޯހުގެ ސަބަބުން ކަސްޓަމްސް އޮފިސަރުންގެ ބަހަވީ ހުނަރު ކުރިއަރައި، ފަތުރުވެރިކަމުގެ ދާއިރާއާ ގުޅުންހުރި މަސައްކަތްތަކަށް އިތުރު ފަހިކަމެއް ލިބިގެންދިޔައެވެ. މެލޭޝިއާގައި ބޭއްވި ޕްރޮގްރާމްގެ ސަބަބުން އެމް.އެން.ޔޫގެ މުވައްޒަފުންނަށް އިލްމީ ދިރާސާކުރުމާއި، މުޤައްރަރު އެކުލަވާލުމާއި، އަދި ދެ މުއައްސަސާގެ ދެމެދުގައި ތަޖުރިބާ ބަދަލުކުރުމުގެ ފުރުސަތު ލިބުނެވެ. ހަމައެއާއެކު، އޮސްޓްރޭލިއާގައި ކުރިއަށްދިޔަ ޕްރޮގްރާމްތަކުގެ ސަބަބުން ބައިނަލްއަޤްވާމީ ފަންނީ މިންގަނޑުތައް ތަޖުރިބާކުރުމާއި، އިލްމީ ފޯރަމްތަކުގައި ދިރާސާތައް ހުށަހެޅުމުގެ އިތުރުން، ދުނިޔޭގެ ފެންވަރުގައި ގުޅުންތައް ބަދަހިކުރުމުގެ ފުރުސަތު ބައިވެރިންނަށް ފަހިވެގެންދިޔައެވެ.
މި މަސައްކަތްތަކަކީ ދެމެހެއްޓެނިވި އުނގެނުމާއި، ފަންނީ ހުނަރު ކުރިއެރުވުމާއި، އަދި ބައިނަލްއަޤްވާމީ ގުޅުންތަކަށް އެމް.އެން.ޔޫއިން ބަހައްޓާ އަހައްމިއްޔަތު ރަމްޒުކޮށްދޭ ކަންކަމެވެ.
މި ރަސްމިއްޔާތުގައި ވާހަކަދައްކަވަމުން ފެކަލްޓީ އޮފް އާޓްސްގެ ޑީން ޑރ. އާމިނަތު ރިޔާޒް ވިދާޅުވީ، ފަންނީ ތަރައްޤީއަކީ ހަމައެކަނި ސެޓްފިކެޓެއް ހާސިލްކުރުން ނޫން ކަމަށާއި، އެއީ އާ ތަޖުރިބާތަކާއި ހުނަރުތައް ހޯދައި، އެކަންކަމުގެ ފައިދާ މުޖުތަމައަށް ފޯރުކޮށްދިނުން ކަމަށެވެ.
- ދިވެހިރާއްޖޭގެ ގައުމީ ޔުނިވަރސިޓީން ވަނީ މި ޕްރޮގްރާމްތައް ކާމިޔާބުކަމާއެކު ނިންމާލުމުގައި އެހީތެރިވެދެއްވި ކާޓިން ޔުނިވަރސިޓީ، އޮސްޓްރޭލިއަން ހައިކޮމިޝަން، ޖަޕާން ފައުންޑޭޝަން، ޖަޕާން އެމްބަސީ، ޔުނިވަރސިޓީ ސައިންސް އިސްލާމް މެލޭޝިއާ، މޯލްޑިވްސް ލައިބްރަރީ އެސޯސިއޭޝަން އަދި މިކަމުގައި ބައިވެރިވި ހުރިހާ މުވައްޒަފުންނަށް ޝުކުރު އަދާކޮށްފައެވެ. އެމް.އެން.ޔޫގެ އަމާޒަކީ މިފަދަ ފަންނީ ތަމްރީނުތަކާއި ބައިނަލްއަޤްވާމީ ގުޅުންތަކުގެ އެހީގައި ޤައުމީ ތަރައްޤީއަށް ބޭނުންވާ ޤާބިލު މީހުން ބިނާކުރުމުގައި ދެމިއޮތުމެވެ.
advertisment
ހިޔާލު