ޚާއްޞަ އެހީއަށް ބޭނުންވާ ކުދިންނަށް ކިޔަވައިދޭން ރ. ވާދޫ ސްކޫލުގައި އިންކުލޫސިވް ލާރނިންގ ސެންޓަރެއް

ޚާއްޞަ އެހީއަށް ބޭނުންވާ ކުދިންނަށް ކިޔަވައިދޭން ރ. ވާދޫ ސްކޫލުގައި އިންކުލޫސިވް ލާރނިންގ ސެންޓަރެއް ހުޅުވައިފިއެވެ.

މި ސެންޓަރު ހުޅުވައި ދެއްވީ މަޖީދިއްޔާ ސްކޫލުގެ ޕްރިންސިޕަލް އަޙްމަދު މުޖާހިދެވެ.

ވާދޫ ސްކޫލުގައި 86 ދަރިވަރުން ކިޔަވަމުންދާއިރު، ޚާއްޞަ އެހީއަށް ބޭނުންވާ ދެ ކުދިން ކިޔަވަމުން ގެންދެއެވެ.

"އަޅުގަނޑުމެންގެ ބޭނުމަކަށްވީ "އެ ދެ ކުދިންނަށްޓަކައި ވެސް ވަޞީލަތް ގާއިމްކޮށްދީގެން އެ ކުދިންގެ އުނގެނުން ކަށަވަރުކޮށްދިނުން. ޚާއްޞަ އެހީއަށް ބޭނުންވާ ކުދިންނަށް ޚާއްޞަ ގޮތެއް އޮންނަންޖެހޭނެ ކަމަށް އަޅުގަނޑުމެން ގަބޫލުކުރީ" ރ، ވާދޫ ސްކޫލުގެ ޕްރިންސިޕަލް އިސްމާއިލް ނަޞީރު ދަރިވަރު ނޫހަށް ވިދާޅުވިއެވެ.

އިސްމާއިލް ވިދާޅުވީ، އިންކުލޫސިވް ލާރނިންގ ސެންޓަރު ޤާއިމް ކުރީ، ކަނޑައަޅާފައިވާ މިންގަނޑުތަކާ އެއްގޮތަށް އެތަނުން އެކަށީގެންވާ ގޮތެއްގައި އެ ދަރިވަރުންނަށް ބޭނުންވާ އެހީތެރިކަން ވެސް ފޯރުކޮށްދެވޭ ގޮތަށް ބަލައިގެން ކަމަށެވެ.

ވާދޫ ސްކޫލުގައި ޤާއިމް ކުރި އިންކުލޫސިވް ލާރނިންގ ސެންޓަރަކީ އެ ސްކޫލުގެ އިސްނެގުމާއެކު އެ ސްކޫލުން މަސައްކަތް ކޮށްގެން ހޯދި ފައިސާއާއި މުވައްޒަފުންގެ މަސައްކަތުން ޤާއިމްކުރި ތަނެކެވެ.

ޕްރިންސިޕަލް ވިދާޅުވީ، އެ ސެންޓަރުގެ މަސައްކަތް ނިންމުމަށް އެ ސްކޫލުގެ ހުރިހާ މުވައްޒަފުން ދެ މަސްދުވަހު ހިލޭ ސާބަހަށް މަސައްކަތް ކޮށްފައިވާ ކަމަށާއި އެތަނުން ފެންނަން ހުރީ އެ މުވައްޒަފުންގެ މަސައްކަތް ކަމަށެވެ.

"ކުޑަ ސްކޫލަކަށް ވިޔަސް ވަޞީލަތްތައް ފުރިހަމަވާންޖެހޭ. ކުދިންނަށް ދެވޭ ތައުލީމު ކަށަވަރުކޮށްދޭންޖެހޭ. އެ ޒިންމާގެ ދަށުން އަޅުގަނޑުމެން މަސައްކަތް ކުރަމުން ދަނީ އެއްބައެއްގެ ގޮތުގައި. މިފަދަ ކޮންމެ ކަމެއް ކާމުޔާބުވުމުގައި ހުރިހާ މުވައްޒަފުންގެ ފަރާތުން ފެނިގެންދަނީ އެކުވެރިކަމާއި އެއްބާރުލުމާއެކު އެކަމެއް ކުރުމުގެ ރޫހު" ޕްރިންސިޕަލް އިސްމާއިލް އެ ސްކޫލުގެ މުވައްޒަފުންނަށް ތައުރީފު ކުރެއްވިއެވެ.

އަލަށް ހުޅުވި އިންކުލޫސިވް ލާރނިންގ ސެންޓަރުން ސެން ޓީޗަރެއްގެ ބެލުމުގެ ދަށުން ދަރިވަރުންނަށް ބޭނުންވާ އެހީތެރިކަން އެންމެ އެކަށޭނެ ގޮތުގައި ލިބެމުންދާނެ ކަމުގެ ޔަޤީންކަން ވެސް ޕްރިންސިޕަލް ދެއްވިއެވެ.

ވާދޫ ސްކޫލުގެ ތައުލީމީ ނަތީޖާއަށް ބަލާއިރުވެސް ފާއިތުވި ހަތް އަހަރުގެ ތެރޭގައި ރަނގަޅު ނަތީޖާއެއް އަންނަނީ ހޯދަމުންނެވެ. ޤައުމީ ގަދަ ދިހައެއްގެ 10ގެ ތެރޭގައި އެ ސްކޫލުގެ ދަރިވަރުން އަންނަނީ ހިމެނެމުންނެވެ. އަދި ފަސް މާއްދާއިން ފާސްވާ ދަރިވަރުންގެ ނިސްބަތް މި އަހަރު 61އިންސައްތައިގައި ހުރިއިރު، ފާއިތުވި ތިން އަހަރު އެ އަދަދު ހުރީ 83އިން މަތީގައެވެ. މި ނަތީޖާ ދަރިވަރުންނަށް ހޯދައިދެނީ އެ ސްކޫލުން ކޮށްދޭ މަސައްކަތުންނެވެ. އެއީ ވަކިވަކިން ކުދިން އަމިއްލައަށް ޓިއުޝަން ނެގުމުގެ ސަޤާފަތެއް އެ ރަށުގައި ނޯންނާތީއެވެ.