ހުޅުމާލޭގައި ހުންނަ ހުރަވީ ސްކޫލުގެ ދޮރުމައްޗަށް ހުއްޓުމާއެކުހެން ކާރުން ފޭބި، ޅ. ނައިފަރު މަދަރަސަތުލް އިފްތިތާޙް ސްކޫލުގެ ދަރިވަރު ނިކްހާ މައިޒަށް ބޭއިޚްތިޔާރުގައި އަތްޖަހައިލެވުނީ ލިޓްލްމެއިޑް ޔުނީފޯމްލައިގެން ތިބި ގިނަ އަދަދެއްގެ ދަރިވަރުން ފެނުމުންނެވެ. ލިޓްލްމެއިޑްސް އެއްތާކުން ފެނުމުން އޭނާއަށް ލިބުނީ ކުއްލި ހައިރާން ކަމަކާއި ބޮޑު އުފަލެކެވެ.
"އޭނައަށް އެނގުނީ، އެއީ އޭނަ ބަލައިގަންނާނެ ބައެއްކަން. އެހެންވެ އުފަލުން އަތްޖަހާލެވުނީ" މީހުން ގިނަ ތަންތަނަށް ދިއުމުން ނިކީއަށް އުނދަގޫވާތީ އޭނާގެ މަންމަ ޢާއިޝަތު ނަޝާ ޢަލީ ހުރީ ކަންބޮޑުވެފައެވެ. "ވަރަށް އުފަލުން ހުރެ ސްކޫލުގެ ދޮރުން އެތެރެއަށް ވަދެގެން ދިޔައީވެސް"
11 އަހަރުގެ ނިކީއަކީ، ސިކްސަރސް ކޭމްޕްގައި ބައިވެރިވި ޚާއްޞަ އެހީއަށް ބޭނުންވާ ހަމައެކަނި ދަރިވަރެވެ.
ނިކީ މިހާރު ކިޔަވަމުންދަނީ އިފްތިތާހުގައި ޚާއްޞަ އެހީއަށް ބޭނުންވާ ދަރިވަރުން ކިޔަވަމުންދާ "އަލިމަސް" ކުލާހުގައެވެ. އެ ކުލާހުގައި އެކި އުމުރުފުރައިގެ ދަރިވަރުން ކިޔަވަމުންދާތީ، އޭނާއާ އެއްއުމުރުފުރައެއްގެ ކުދިންނާ ދިމާވަނީ މަދު ފަހަރެއްގައެވެ. އެހެންވެ އިތުރު ހަރަކާތެއްގެ ގޮތުން ލިޓްލްމެއިޑްގައި ބައިވެރިކުރީ އޭނާއަށް އެ ފުރުޞަތުގެ ހޯދައިދިނުމުގެ ގޮތުން ކަމަށް ނަޝާ ބުންޏެވެ.
ނިކީގެ މަންމަ ނަޝާ ބުނީ، ސިކްސަރސް ކޭމްޕްގައި ނިކީ ބައިވެރިވުމުގެ ފުރުޞަތު ސްކޫލުން ދިނުމުން ފުރަތަމަ ޖެހިލުންވި ނަމަވެސް އެ ފުރުޞަތުގެ ބޭނުން ހިފީ ނިކީއަށް ތަފާތު ތަޖުރިބާތަކެއް ކުރުމުގެ ފުރުޞަތު ހޯދައި ދިނުމުގެ ބޭނުމުގައި ކަމަށެވެ. އެއާއެކު ސްކޫލުގެ ފަރާތުން ބައިވެރިވާ ގައިޑް ލީޑަރުންނަށް އިތުބާރު ވެސް އޮތުމުން ކަމަށެވެ.
" ނައިހާ މިސް އެވާހަކަ ހިއްސާކުރުމުން އަޅުގަނޑު ބުނިން، ގައިޑް އެސޯސިއޭޝަނުގެ މައްސަލައެއް ނެތިއްޔާ އަޅުގަނޑުގެ މައްސަލައެއް ނެތޭ، ހަވާލުވެގެން ސްކޫލުންދާ މުދައްރިސުންނާމެދު އިތުބާރު އެބައޮތޭ" ނަޝާ ބޭނުންވީ ދަރިފުޅަށް ލިބެން އޮތް ފުރުޞަތުގެ ބޭނުން ހިފާށެވެ.
ތިން ދުވަހަށް ކޭމްޕް ދެމިގެން ދިޔައިރު، ނިކީއާއެކު މާލެއައި އޭނާގެ މަންމަ ކަންބޮޑުވީ ނިކީގެ ކެއުމާ މެދުގައެވެ. އެއީ އެހެން ކުދިންނާއެކު އެކުދިން ކާއެއްޗެއް ނިކީއަށް ނުކެވިދާނެތީއެވެ. އެހެންވެ އޭނާ ހުރީ މުދައްރިސުންގެ ފޯންކޯލެއްގެ އިންތިޒާރުގައި ނިކީއަށް ކާއެއްޗެހި ތައްޔާރު ކޮށްގެންނެވެ.
"ތިން ދުވަހުގެ ތެރޭގައި އަޅުގަނޑަށް ފުރުޞަތު ލިބުނީ އެންމެ ފަހަރަކު ދާން. އެއީ ވެސް ނިކީގެ ހެދުން ބަދަލުކޮށްލަން. އެހެން ކުދިންނާއެކު އެކުދިން ކާއެއްޗެއް ކައިގެން އެ އުޅުނު އުފާވެރި މަންޒަރު ފެނުނީމާ ވަރަށް އުފާވި. ނިކީއާ އަލަށް ދިމާވި ކުދިންގެ ފަރާތުން ވެސް ނިކީއާމެދު ޚާއްޞަ ގާތް ކަމެއް ބަހައްޓާތަން ފެނުމަކީ ލިބުނު ސަޕްރައިޒެއް " ނަޝާ ބުންޏެވެ.
އިފްތިތާހުގެ ގައިޑް މުދައްރިސް ފާހަގަކުރިގޮތުގައި ސިކްސަރސް ކޭމްޕް ފުރިހަމަކޮށް ނިންމާލީ ނިކީގެ ހިތްވަރުން ކަމަށާއި ވާހަކަ ނުދެއްކުނަސް ހިތްވަރާއެކު ކުރިއަށް ދިއުމުގެ ޝައުޤުވެރިކަން ހުރި ދަރިވަރެއްކަން ސާބިތުކޮށްދީފައިވާ ކަމަށެވެ. އަދި އެވީ ކުރު މުއްދަތުގެ ތެރޭގައި އެންމެންގެ ލޯބި ހޯދާފައިވާކަން ވެސް އޭނާ ފާހަގަކުރިއެވެ.
"ނިކީގެ ކާމިޔާބަކީ އޭނާގެ މަންމައާއި ބައްޕަގެ ފަހި ވިސްނުން. ނިކީއަށާއި ސްކޫލާއި މުދައްރިސުންނަށް ކުރި އިތުބާރު" މުދައްރިސް ފާހަގަކުރިއެވެ.
އޭނާ އިތުރަށް ފާހަގަކުރީ، ލިޓްލްމެއިޑް ބައްދަލުވުންތަކަށާއި ހޯދަންޖެހޭ ތަކެއްޗާއި އަދި ނިންމަންޖެހޭ ފިލާވަޅުތައް ބަރާބަރަށް ނިންމައި ދިނުމަށް ނިކީގެ މައިންބަފައިން ޚާއްޞަ ސަމާލުކަންދޭ ކަމަށެވެ.
"އަޅުގަނޑުމެންގެ ސްކޫލުގެ (އިފްތިތާޙް) ކޮންމެ މުދައްރިސަކީ ވެސް ކޮންމެ ދަރިވަރަކީ ވެސް ނިކީފަދަ ދަރިވަރުންނަށް އަޅާލައި އެހީތެރިކަން ފޯރުކޮށްދެމުންދާ ކުދިންނާއި މުދައްރިސުން" އޭނާ އިތުރުކޮށްލިއެވެ.
ގާލްގައިޑު އެސޯސިއޭޝަނުން ބުނީ، ހުރަވީ ސްކޫލުގައި ބޭއްވި "ސިކްސަރސް ކޭމްޕް 2026″ ކާމިޔާބުކަމާއެކު ނިކީ ފުރިހަމަކޮށްނިންމުމުން ފަޚުރުވެރިވާ ކަމަށެވެ.
އެ އެސޯސިއޭޝަންގެ ފޭސްބުކުގައި ހިއްސާކޮށްފައިވާ ގޮތުގައި، ކޮންމެ އަންހެން ކުއްޖަކަށްމެ ލިބެންޖެހޭ ފުރުޞަތުތަކާ އެއްގޮތަށް، ނިކްހާ އެ ކޭމްޕުގައި ބައިވެރިވީ އައު ކަންތައްތަކެއް އުނގެނުމަށާއި، ފޮނި ހަނދާންތަކެއް އާލާކޮށް، އަމިއްލަ ނަފްސުގެ ކުރިއެރުން ހޯދުމުގެ މަޤްޞަދުގައެވެ.
"ނިކްހާގެ މި ދަތުރަކީ "މައި ޕާތް، މައި ޕޭސް" ޝިޢާރުގެ ފުރިހަމަ މާނަ އަޅުގަނޑުމެންނަށް ހަނދާންކޮށްދޭ ދަތުރެކެވެ.
އެއީ ކޮންމެ ކުއްޖަކީ ވެސް ތަފާތު ހުނަރުތަކެއް ލިބިފައިވާ ޚާއްޞަ ކުއްޖެއްކަން ބަލައިގަނެ، އެކުއްޖަކު ހުރި މަރުޙަލާއަކުން ފެށިގެން ކުރިއަށްދިއުމަށް ބޭނުންވާ ޖާގައާއި، އެހީތެރިކަމާއި، ފުރުޞަތުތައް ފަހިކޮށްދީ، ގާލްގައިޑުންގެ ތަޖުރިބާ އެކުއްޖަކަށް ފެންނަ އެންމެ ފުރިހަމަ ގޮތުގައި ހޯދައިދިނުމެވެ." ގާލްގައިޑް އެސޯސިއޭޝަންގެ ފޭސްބުކު ޕޭޖުގައި ލިޔެފައިވެއެވެ.
"މިއީ އިޚްލާޞްތެރިކަމާއެކު އިސްނެގުމެވެ. ކޮންމެ ކުއްޖަކަށް ޓަކައި ޖާގަ ހޯދައިދީ، އެކުދިންގެ ކިބައިގައިވާ ޤާބިލުކަމަށް އިތުބާރުކޮށް، އެކުދިން ކުރިއަރަމުންދާއިރު އެކުގައި ސާބިތުވެ ތިބުމެވެ. ނިކްހާގެ މި ދަތުރުގައި އަޅުގަނޑުމެންނަށް އިތުބާރުކުރެއްވި ކަމަށްޓަކައި އޭނާގެ ޢާއިލާއަށް ނުހަނު އިޚްލާޞްތެރިކަމާއެކު ޝުކުރު ދަންނަވަމެވެ. އަދި ނުހަނު ކެތްތެރިކަމާއި، ލޯތްބާއި، އިތުބާރާއެކު ނިކްހާއަށް އެހީތެރިކަން ފޯރުކޮށްދެއްވި ގައިޑަރުންނާއި ލީޑަރުންނަށް ވެސް ޝުކުރު އަދާކުރަމެވެ."
ގާލްގައިޑިންގް ހަރަކާތަކީ ކޮންމެ ކުއްޖަކަށްވެސް އެކުއްޖެއްގެ އަމިއްލަވަންތަކަމާއެކު ބައިވެރިވެވޭނެ، އެންމެން ހިމެނޭ ފަދަ މާޙައުލެއް ކަމަށާއި، އަމިއްލަ ގޮތުގައި އިސްނަގައިގެން ކުރިއަށް ދިއުމުގައި ސާބިތުވެ ހުރުމަށް ނިކްހާއަށް ގާލްގައިޑް އެސޯސިއޭޝަނުން ހިތްވަރު ދީފައިވެއެވެ.
ނިކީގެ މި ދަތުރުގައި ނިކީގެ ތެރަޕީތައް ނަގަމުން އަންނަ ނައިފަރު ބްލިސް ކެއަރ އަދި މަދަރުސަތުލް އިފްތިތާޙުގެ ސެން ޓީޗަރުންގެ ފަރާތުން ލިބެމުންދާ އެހީތެރިކަމަށް ޚާއްޞަ ޝުކުރެއް ނިކީގެ އާއިލަން އަދާކުރެއެވެ.
ނިކްހާގެ މަންމަ ބުނީ، ޚާއްޞަ އެހީއަށް ބޭނުންވާ ކުދިން އިތުރުހަރަކާތުގެ ތެރޭގައި ގެންގުޅުން މުހިންމު ކަމަށާއި އެކަމުގައި ބެލެނިވެރިންގެ އެހީތެރިކަން ބޭނުންވާނެ ކަމަށެވެ. ސްކޫލުން ތަނަވަސްކޮށްދޭ ފުރުޞަތުގެ ބޭނުން ދަރިވަރަށް ހޯދައިދިނުމުގައި މައިންބަފައިންގެ ރޯލު ވަރަށް މުހިންމެވެ. އެހެން ކުދިންނެކޭ އެއްގޮތަށް ހަރަކާތްތަކުގައި ވެސް ބައިވެރިވެ ކުރިއަށް ދެވޭނެކަން ހަމަގައިމުވެސް ނިކީ އެވަނީ ސާބިތުކޮށްދީފައެވެ.
advertisment
ހިޔާލު