ކުރިއަށްދާނެ ދާއިރާތަކުން ދަރިވަރުންނަށް އެހީތެރިވުމަށް "އެމްއެންޔޫ ފިއުޗަރ ރެޑީ ސީރީޒް" އިފްތިތާޙުކުރަނީ

ދަރިވަރުންގެ ޝައުޤުވެރިކަމާއި ހުނަރުތަކާ ގުޅޭގޮތުން، ތަޢުލީމީ އަދި ވަޒީފާގެ ދާއިރާއިން ކުރިއަށްދާނެ ރަނގަޅު ގޮތްތައް ނިންމުމަށް އެހީތެރިވުމުގެ މަޤްޞަދުގައި "އެމް.އެން.ޔޫ ފިއުޗަރ ރެޑީ ސީރީޒް" ގެ ނަމުގައި ޚާއްޞަ ސިލްސިލާއެއް ފެށުމަށް ދިވެހިރާއްޖޭގެ ޤައުމީ ޔުނިވަރސިޓީން ވަނީ ނިންމާފައެވެ.

މި ސިލްސިލާގެ ފުރަތަމަ ސެޝަން "އެމް.އެން.ޔޫ ފިއުޗަރ ރެޑީ: ޑިސްކަވަރ ޔޯ ޕާތް. ޝޭޕް ޔޯ ފިއުޗަރ" ބޭއްވުމަށް ހަމަޖެހިފައިވަނީ 24 ސެޕްޓެމްބަރު 2026 ވާ ބުރާސްފަތި ދުވަހުގެ މެންދުރުފަހު 14:00 ގައި، ޤައުމީ ޔުނިވަރސިޓީގެ މަރުކަޒީ އިދާރާގެ އޮޑިޓޯރިއަމްގައެވެ.

ކެރިއަރ ގައިޑެންސް ނުވަތަ ދާއިރާ އިޚްތިޔާރުކުރުމާ ގުޅޭގޮތުން ބާއްވާ މި ސެޝަނަކީ ޚާއްޞަކޮށް ގްރޭޑް 8 އެއްގެ ދަރިވަރުންނަށް އަމާޒުކޮށްގެން ކުރިއަށްގެންދާ ސެޝަނެކެވެ. މީގެ ސަބަބުން ދަރިވަރުންގެ ކިބައިގައި ހުރި ހުނަރުތަކާއި ޝައުޤުވެރިކަން ދެނެގަނެ، މަތީ ސާނަވީގައި އިޚްތިޔާރުކުރާ މާއްދާތަކުގެ ސަބަބުން ކުރިމަގުގެ ތަޢުލީމީ އަދި ވަޒީފާގެ ފުރުޞަތުތަކަށް ކުރާނެ އަސަރުތައް ބަލައި، ދެނެގަތުމުގެ ފުރުޞަތު ލިބިގެންދާނެއެވެ.

ތަފާތު ޙަރަކާތްތަކާއި މަޝްވަރާތައް ހިމެނޭ މި ސެޝަންގެ ތެރެއިން، ދަރިވަރުން ކުރިއަށްދާން ބޭނުންވާ ތަފާތު ދާއިރާތައް ދެނެގަތުމަށާއި، ކިޔަވާ މާއްދާތަކާއި މަސައްކަތުގެ މާޙައުލާ ހުރި ގުޅުން ދެނެގަތުމަށް ހިތްވަރު ދެވޭނެއެވެ. މި ސެޝަންގެ މައިގަނޑު މަޤްޞަދަކީ ދަރިވަރުންގެ ތަޢުލީމީ ނިންމުންތައް އިތުރު ހޭލުންތެރިކަމާއި އިތުބާރާއެކު ނިންމުމަށް މަގުފަހިކޮށްދިނުމެވެ.

"އެމް.އެން.ޔޫ ފިއުޗަރ ރެޑީ ސީރީޒް" އަކީ ކްލާސްރޫމުން ބޭރުން ޒުވާނުންނަށް ބޭނުންވާ އިރުޝާދާއި ފުރުޞަތުތައް ފަހިކޮށްދީ، ހަރުދަނާ ތަޢުލީމީ އަދި ކެރިއަރ ޕްލޭނެއް އެކުލަވައިލުމަށް އެހީތެރިވުމަށް ޤައުމީ ޔުނިވަރސިޓީން ކުރަމުންދާ މަސައްކަތުގެ ތެރެއިން ކުރިއަށްގެންދާ ޕްރޮގްރާމެކެވެ.

މި ސެޝަންގައި ބައިވެރިވާން ބޭނުންވާ ދަރިވަރުން، ދިވެހިރާއްޖޭގެ ޤައުމީ ޔުނިވަރސިޓީން ދޫކޮށްފައިވާ ރެޖިސްޓްރޭޝަން ލިންކު މެދުވެރިކޮށް ޖާގަ ކަށަވަރުކުރުމަށް އެ ޔުނިވަރސިޓީން އިލްތިމާސްކުރެއެވެ.