ދަރިވަރު ނޫހަކީ އާންމު ނޫސްތަކާ ޚިލާފަށް ތައުލީމީ ދާއިރާއަށް ޚާއްޞަކޮށްގެން ޚަބަރާއި މައުލުމާތު ގެނެސްދޭ އޮންލައިން ނޫހެކެވެ. މި ނޫހުން ގެނެސްދޭ ޚަބަރަކުން، ފޮޓޯއަކުން ވެސް އެއްވެސް ކުއްޖަކަށް ތައުލީމީ މުއައްސަސާއަކަށް އަދި ކިޔަވައިދޭ އެއްވެސް މުދައްރިސަކަށް ނޭދެވޭ އަސަރެއް ނުކުރާނެއެވެ. މި ނޫހުން ބާރުއަޅާނީ ފައްސި ވިސްނުން ކުރިއަށް ނެރުމަށެވެ. މުޖްތަމައަށް ހެޔޮ ބަދަލެއް ގެނައުމަށް އަޚްލާޤީ ގޮތުންނާއި އިޖްތިމާއީ ގޮތުން ފޭރާން ހެޔޮ އެންމެންނަށް ކިޔާލެވޭ މައުލޫމާތާއި ޚަބަރު ގެނެސްދިނުމަކީ މި ނޫހުގެ އެންމެ މަތީ މަސްލަހަތެވެ.  އެގޮތުން މި ނޫހުގައި މަސައްކަތް ކުރާ ހުރިހާ ފަރާތްތަކުން ވެސް ކޯޑް އޮފް އެތިކްސް އަށް އަމަލުކުރަން ލާޒިމްވާނެއެވެ. ކޯޑް އޮފް އެތިކްސް ބިނާވެފައި ވަނީ ވަކި ކުއްޖެއް މީހަކު، ވަކި ތަނެއް ތަފާތު ކުރުމެއް ނެތި ފަރާތަކަށް ނުޖެހި ތެދުވެރިކަމާއެކު މައުލޫމާތު ފޯރުކޮށްދިނުމަށެވެ. އެގޮތުން: 

1. ޚަބަރާއި މައުލޫމާތު ގެނެސް ދޭނީ ތެދު ހަޤީޤަތުގެ މައްޗަށެވެ. ޔަޤީން ނުކުރެވޭ އެއްވެސް މައުލޫމާތެއް ގެނެސް ނުދޭނެއެވެ.

    

2. އެއްޗެއް ލިޔުމަށް ނުވަތަ އުފެއްދުމަށް އެއްވެސް ފަރާތަކުން ރިޝްވަތުގެ ގޮތުގައި ދޭ އެއްވެސް އެއްޗެއް ނޫސްވެރިޔާ ނުހިފާނެއެވެ.

    

3. ލިޔާއިރު މައުލޫމާތު ދޭ ފަރާތުގެ ނަން ސިއްރު ކުރަން ޖެހިއްޖެ ފަދަ ހާލަތެއްގައި ފިޔަވައި, މައުލޫމާތު ދޭ ފަރާތުގެ ނަން ހިމަނާނެއެވެ.

    

4. ހަބަރަށް މައުލޫމާތު ހޯދާއިރު ނޫސްވެރިޔާއަކީ ކާކުކަން ހާމަކުރާނެއެވެ. އަދި ނޫސްވެރިޔާ އިންޓަވިއު ރެކޯޑް ކުރާނީ އިންޓަވިއު ދޭ މީހާގެ ރުހުމާއެކުއެވެ. 18 އަހަރު ނުފުރޭ ކުދިންގެ ވާހަކަތައް ވެސް ގެނެސްދޭ ނޫހަކަށް ވާތީ، އެއްވެސް ކުއްޖެއްގެ މައުލޫމާތު ގެނެސްދޭނީ އެ ކުއްޖެއްގެ ބެލެނިވެރިޔާ ނުވަތަ އެ ކުއްޖަކު ކިޔަވާ ސްކޫލެއްގެ ހުއްދައާއެކުގައެވެ. ސީދާ ކުއްޖާއާ ވާހަކަ ދައްކާނީ މަންމައާއި ބައްޕަ ނުނީ ބެލެނިވެރިފަރާތުގެ ހާޒިރުގައެވެ. ނޫނީ ބެލެނިވެރިޔާގެ އިޒުނައާއެކުގައެވެ.

    

5. ކުޑަކުދިންގެ ހަބަރާއި މައުލޫމާތު ނޫހުގައި ލިޔާއިރު އެ ކުދިންގެ ނަމެއް/ ފޮޓޯއެއް ނުހިމަނާނެއެވެ. ހިމަނަންޖެހިއްޖެ ނަމަ އެކަން ކުރާނީ އެ ކުއްޖެގެ ބެލެނިވެރިއެއްގެ ހުއްދަ ހޯދައިގެންނެވެ.
6. ލިޔުންތަކުގެ ބަހުރުވަ ހުންނާނީ ސާދާކޮށް ކިޔުންތެރިންނަށް އޮޅުން ނާރާ ގޮތަށެވެ. އޮޅުން އަރާ ގޮތަށް ނުވަތަ ކޮންޓެންޓުގައި ކުށެއް ވާކަން އެނގިއްޖެ ނަމަ އެކަން ވީހާވެސް އަވަހަކަށް އިސްލާހު ކުރާނެއެވެ.

ދަރިވަރު ނޫހުގެ އެޑިޓޯރިއަލް މައުގަނޑު ސިޔާސަތުތަކަކީ:

 ތެދު ހާމަކުރުން: ދަރިވަރު ނޫހުން ދެމިތިބޭނީ މައުލުމާތާއި ތެދު ޚަބަރު ހާމަކުރުމުގައެވެ. ސައްޙަ ގޮތުގައި މައުލޫމާތެއް ކަށަވަރު ނުކުރެވެނީސް ދަރިވަރު ނޫހުން އެ ޚަބަރެއް ގެނެސް ނުދޭނެއެވެ.

1. އިސްލާމް ދީނުގެ އުސޫލުތަކަށް ތަބައަވުން: ދަރިވަރު ނޫހުގެ އެއްވެސް އުފެއްދުމެއް އިސްލާމް ދީނުގެ އުސޫލުތަކާ ހިލާފު, އަދި ދީނާއި ދިވެހިންގެ ސަގާފަތާއި ގަބޫލުކުރުންތަކާ ދެކޮޅެއް ނުވާނެއެވެ. މި ނޫހުން އަބަދުވެސް މަސައްކަތް ކުރާނީ އިސްލާމް ދީން މަތިވެރިކުރުމަށެވެ.

    

2. ނުފޫޒުތަކުގައި ނުޖެހުން: ތައުލީމަށް ޚާއްޞަ ނޫހަކަށް ވާތީ، އެއްވެސް ކުއްޖެއް އެއްވެސް މުއައްސަސާއެއް ތަފާތެއް ނުކުރާނެއެވެ. އަދި އެއްވެސް މުއައްސަސާއެއް ސްކޫލެއް ބެލެނިވެރިއެއް އަދި ދަރިވަރެއްގެ ނުފޫޒެއްގައި ނުޖެހޭނެއެވެ. މިނިވަންކަމާއި ވަކި ކަމެއް ޙާޞިލް ކުރުމަށް ކުރާ ކުރާ އެންމެހައި ކަންތައްތަކުން މި ނޫހުގެ އިސްވެރިންނާއި މުވައްޒަފުން ވެސް ތިބޭނީ އެއްކިބާވެއެވެ. ނޭދެވޭ އެއްވެސް މަންފާއެއް މި ނޫހުން ބަލައެއް ނުގަންނާނެއެވެ.

    

3. އިންސާފުވެރިކަން: އެޑިޓޯރިއަލް ސިޔާސަތުގެ މައިގަނޑު ގަބޫލުކުރުމަކީ ހަބަރާއި ރިޕޯޓްތަކާއި އެހެނިހެން އުފެއްދުންތައްވެސް އިންސާފުވެރިކަމުގެ މައްޗަށް ބިނާކުރުމެވެ.

    

4. ހަމަހަމަކަން: ހަބަރާއި ރިޕޯޓްތަކާއި އެހެންވެސް އުފެއްދުންތައް ގެނެސްދޭނީ ވަކި ފަރާތަކަށް ނުޖެހި ހަމަހަމަކަމުގެ މައްޗަށް އިސްކަންދީގެންނެވެ. އެގޮތުން ހަބަރާއި ރިޕޯޓްތައް ގެނެސްދިނުމުގައި ދެފަރާތުގެ ބަސް ހިމެނުމަށް އަބަދުވެސް މަސައްކަތްކުރާނެއެވެ.

    

5. އާންމު މަސްލަހަތަށް އިސްކަންދިނުން: ދިވެހި ރައްޔިތުންގެ އާންމު މަސްލަހަތަށް އަބަދުވެސް އިސްކަންދޭނެއެވެ. އާންމު މަސްލަހަތާ ގުޅޭ ކަންކަން ގެނެސްދިނުމުގައި އާންމުންގެ ހިޔާލާއި ވިސްނުން ގެނެސްދޭން މަސައްކަތް ކުރާނެއެވެ.

    

6. ކުޑަކުދިންގެ ކަރާމާތަށް އިސްކަންދިނުން: ކުޑަކުދިންނާ ގުޅޭ އުފެއްދުންތައް ގެނެސްދޭއިރު އެ ކުދިންގެ ކަރާމާތަށް އުނިކަން ލިބޭނެ އެއްވެސް ކަމެއް ނުކުރާނެއެވެ. ކުޑަކުދިންނާ ގުޅޭ މައްސަލަތަކުގައި އެ ކުދިންނަކީ ކޮން ބައެއްކަން އެނގޭ ގޮތަށް ނުވަތަ ކުދިންގެ ހައްގަށް އުނިކަމެއް އަންނާނެ އެއްވެސް ކަމެއް ނުކުރާނެއެވެ. މި ނޫހުން އަބަދުވެސް މަސައްކަތް ކުރާނީ ކުޑަކުދިންގެ ހިމާޔަތަށެވެ.

    

7. ފިކުރީ މުދަލަށް އިހްތިރާމް ކުރުން: ލިޔާ ލިޔުމެއް ރިޕޯޓެއް އަދި އެހެނިހެން އުފެއްދުމެއްވިޔަސް ތިންވަނަ ފަރާތެއްގެ ފިކުރީ މުދަލެއް ބޭނުން ކުރާ ނަމަ އެކަން ކުރާނީ ހުއްދަ ހޯދައިގެން ނުވަތަ އެ މުދަލެއްގެ ވެރިފަރާތަކީ ކޮބައިކަން އަންގައި އެ ބަޔަކަށް ދޭންޖެހޭ ކްރެޑިޓް ދީގެންނެވެ.

    

8. މަސްދަރުގެ ސިއްރު ހިފެހެއްޓުން: ނަން ސިއްރުކުރުމަށް ޝަރުތުކޮށް މައުލޫމާތު ދޭ މަސްދަރުތަކުގެ ސިއްރު މި ނޫހުން ހިފަހައްޓާނެއެވެ. އެކަމުގެ ޔަގީންކަމާއި އިތުބާރު އަބަދުވެސް ދަމަހައްޓާނަމެވެ. އެއީ އެންމެ މަތީ މަސްލަހަތުތަކުގެ ތެރޭގައި ހިމެނޭނެ ކަމެކެވެ.

    

9. ކުށެއްކަން އެނގިއްޖެނަމަ އިސްލާހުކުރުން: ގެނެސްދޭ އެއްވެސް ޚަބަރެއް މައުލޫމާތެއްގައި ކުށެއް އޮވެއްޖެނަމަ ނުވަތަ ކުށެއް ޖެހިފައި އިންކަން އެހެން ފަރާތަކުން އަންގައިފި ނަމަ އެކަން ވީހާވެސް އަވަހަކަށް އިސްލާހުކުރާނެއެވެ.